Бэс ыйын 11 күнүгэр дьоллоох Туймаада уйгулаах хочотугар Үс Хатыҥҥа, Өрөспүүбүлүкэтээҕи көрбөттөр уопсастыбалара 85 сааһын бэлиэтиир үбүлүөйдээх үрүҥ тунах ыһыаҕа ньиргийэн ааста. Бу улахан ыһыахха орой мэник оҕолортон саҕалаан орто, улахан саастаах дьон, ону тэҥэ ыраахтан-чугастан ыҥырыллыбыт ытык мааны ыалдьыттар төбүрүөннээх түһүлгэҕэ түмүстүлэр.
Аан маҥнай бука бары тоҕуоруһа мустан күн эргиирин тула төгүрүччү туруннулар. Ол кэннэ өбүгэлэрбит үгэстэрин тутуһан алгысчыт аал уот оттон, сахалыы сиэри-туому толорон уйгулаах ыһыахпытын арыйда. Мустубут дьон алгыс ылынан, ыһыах бастыҥ аһын кымыһы иһэн, мип-минньигэс саһарчы буспут алаадьы амсайан олус астыннылар, дуоһуйдулар. Үбүлүөйдээх ыһыаҕынан маҥнайгынан Өрөспүүбүлүкэтээҕи көрбөттөр уопсастыбаларын председателя Владислав Николаевич Николаев эҕэрдэлээтэ. Ол кэннэ үлэ уонна социальный харысхал, спорт министиэристибэлэриттэн эҕэрдэ тыл бастыҥа этилиннэ, бэлэх туһахтаах бочуотунай грамоталар туттарылыннылар.
Омоҕой оҕонньор саҕаттан олохтоммут оонньууга бары бииргэ түмсэн – оһуокайдаатылар, хабылыктаан күрэстэһэн ханыыластылар уонна мас тардыһан хачыгыратан күүс-уох өттүнэн эбиннилэр. Үбүлүөйдээх ыһыах биир саамай кэрэ-бэлиэ киэргэлинэн, үтүмэн үгүс көрөөччү болҕомтотун тардар, мэлдьи элбэх кыттааччылаах саха таҥаһыгар күрэхтэһии буолла. Бары кыайыылаахтарга диплом уонна сыаналаах бириис туттарылынна.
Быйылгы улуу тунах ыһыахха Арассыыйа илин-арҕаа муннугуттан араас дойду туйгуннара кэлэн ыалдьыттаан барбыттара кэрэхсэбиллээх. Ол курдук Новосибирск, Йошкар-Ола, Оренбург уо.д.а куораттартан урут былыр үөрэнэ, үлэлии сылдьыбыт биир үөлээннээхтэр кэлэн уруккуну-былыргыны санаһан, ахтыһан бардылар. Биһиги бу кэлбит ыалдьыттары кытта санаа атастаһан билистибит, кэпсэттибит:
Мария Михайлова – Хабаровскай куорат
— Бастатан туран барыгытын үбүлүөйдээх ыһыаҕынан итиитик-истиҥник эҕэрдэлиибин! Бу тэрээһини олус өр күүппүтүм. Онон бүгүн манна мин ыҥырыы сурук тутаммын, олус үөрэн-долгуйан кэлэн турабын. Наһаа үчүгэй улахан далааһыннаах ыһыах буола турар.
Саха сириттэн оскуолабын бүтэрээт, 1973 сыллаахха Хабаровскайга көһөн барбытым. Онтон ыла дойдум салгынын уонна үрүҥ түүннэри ахтаммын хас сайын аайы кэлэ сатыыбын.
Күндү биир дойдулаахтарым, самаан сайыны уруйдуу көрсө бүгүҥҥү үбүлүөйдээх үрүҥ тунах ыһыахтан күүс-күдэх ылынан, санааҕытыгар эрчимнээх санаа эбэн самныбакка иннин хоту баран иһин, үтүөнү эрэ түстэһиҥ, кэрэни эрэ кэрэхсээҥ диэн ыллыктаах баҕа санаабын тиэрдэбин!
Нина Иосифовна Макарова – Новосибирскай куорат:
— Бүгүн мин саха урааҥхай саргытын түстүүр Үс Хатыҥ түһүлгэтигэр тураммын биһиги кэккэбититтэн номнуо туораабыт ытык дьону ахтан санаан ааһыахпын баҕарабын… Көрбөттөр оскуолаларын биир бастакы учуутала, өр кэмҥэ үтүө суобастаахтык председателинэн үлэлээбит Георгий Алексеевич Слепцову, Ленинград куораттан кэлбит нуучча тылын уонна литературатын учууталын Зинаида Федоровнаны, ону тэҥэ эмиэ көрбөттөр уопсастыбаларын салайан-тутан олорбут Гаврил Алексеевич Слепцову уонна Семен Романович Макаровы. Кинилэри мин күн бүгүнүгэр диэри олус истиҥник саныыбын. Зинаида Федоровна миэхэ иккис ийэм тэҥэ чугас киһи буолбута, куруутун сүбэлиир, өйүүр этэ.
Онтон бэйэм туспунан кылгастык кэпсээн аһардахха, биир уһун болдьоххо коррекционнай оскуолаҕа пионер-баһаатыйынан үлэлии сылдьыбытым. Бүгүн бииргэ үлэлээбит дьоммун көрсөн олус астынан-дуоһуйан турабын. Бу улахан тэрээһини тэрийбит уопсастыбабыт бары үлэһиттэригэр барҕа махталбын, дириҥ ытыктабылбын тиэрдэбин. Өссө даҕаны бу курдук биир сомоҕо күүс буолан муста, бэйэ-бэйэбитин өйдөһө-өйөһө туруох!
ОКСАНА Васильева
