Уус Алдан улууһугар СР култуураҕа уонна духуобунай сайдыыга министиэристибэтин күннэрин чэрчитинэн Өрөспүүбүлүкэтээҕи көрбөттөр анал библиотекалара кулун тутар 18 күнүгэр Курбуһахтааҕы кырдьаҕастар уонна инбэлииттэр интернат-дьиэлэригэр ыалдьыттаата. Библиотека кэтэх(заочнай) абонемена сыллата өрөспүүбүлүкэ үрдүнэн 25 улууһу хабан үлэлиир. Кинигэ биэрэрин, ыытарын таһынан библиотека сылын аайы улуустарга араас интэриэһинэй тэрээһиннэри тэрийэн ыытар. Ол курдук Саха литературатын төрүттээччилэртэн биирдэстэрэ, дэгиттэр талааннаах суруйааччы, общественнай деятель А.И. Софронов – Алампа төрөөбүтэ 130 сааһыгар аналлаах айар биэчэр Курбуһахха буолан ааста. Интернат-дьиэҕэ бүгүҥҥү туругунан уопсайа 51 киһи олороруттан 6 киһи хараҕынан инбэлиит уонна 33 киһи хараҕа ыалдьар диагнозтаах. Онон библиотека интернаты кытары ыкса ситимнээхтик үлэлиир.
Куруутун ураты тыыннаах сырдыгынан сыдьаайар интернат-дьиэ бу да сырыыга биһигини итии чэйдээх, сахалыы минньигэс остуоллаах көрүстэ. Оруобуна биэчэрбит буолар чааһыгар саалаҕа интернат олохтоохторо тоҕуоруһа мустан хайыы-үйэ биһигини көһүтэн олороллоро. “Биһиэхэ бу күннэргэ артыыс, ырыаһыт бөҕө ыллаан барда, олус сэргэхситтэ. Онон эһиги кэлбиккит эмиэ наһаа үчүгэй!” – диэн киирээппитин кытта кэпсээн кэһиилээх көрүстүлэр. Биэчэрбит Алампа олоҕун, айар үлэтин туһунан кылгас ахтыыттан уонна викторинаттан саҕаланна. Ону тэҥэ көрбөттөргө аналлаах саҥа техниканы аҕалан көрдөрдүбүт, кэпсээтибит. Бу киэһэни библиотека чугас доҕоро, биллэр композитор-мелодист Луҥха Өлөксөйө уонна кини үөрэнээччитэ педколледж устудьуона Татьяна Тихонова киэргэттилэр. Ылбаҕай ырыа ылланна, дуорааннаах тыл-өс иһилиннэ. Ырыаһыттары кытары ааҕааччыларбыт эмиэ тыыннаах баян доҕуһуолунан Алампа ырыа буолбут хоһооннорун ыллаан-туойан дуоһуйдулар.
Павел Павлович Портнягин – 72 саастаах, интернат-дьиэ олохтооҕо:-
Бүгүн олус интэриэһинэй үчүгэй биэчэр буолан ааста диэн бэлиэтиибин. Иллэҥ кэмим чугас доҕорун – саҥарар кинигэбин истэр саҥа техникалар үөдүйбүттэрин биһирии иһиттим. Мин билигин даҕаны былыргылыы кассетанан магнитафоҥҥа истэ сылдьабын. Аныгы киһи быһыытынан ити кэпсээбит тэриллэригэр истэр буолсубун мантан ыла. Эдэр да эрдэхпиттэн кинигэ ааҕарбын туохха да биэрбэтим. Онтон 1991 сыллаахтан харахпынан сырдыгы, хараҥаны эрэ нэһиилэ кылатан араарар буолуохпуттан библиотека оҥорон таһаарар саҥарар кинигэтэ куруутун миэхэ күүтүүлээх атаһым буолан турар. Онон бу курдук кэлэн ыалдьыттаан, биһигини көрөн-истэн бараргыт олус үчүгэй.
Марфа Анатольевна Пестрякова – Уус-Күөл библиотекара:-
Биһиги нэһилиэккэ уопсайа 7 хараҕынан инбэлиит дьону хабан үлэлиибин. Үксэ 80-нарын быдан ааспыт аарыма кырдьаҕастар. Бүгүн манна эһиги кэлбиккитин истэммин икки саамай көхтөөх ааҕааччыларбын илдьэ кэллим. Дьонум саҥа техника туһунан информацияны уонна ырыаны-тойугу истэннэр күннэрин туһалаахтык атаардылар. Өссө даҕаны бу курдук сэргэх, элбэх кэрэ кэпсээннээх биһиэхэ кэлэ тураарын диэн баҕа санаабын тиэрдэбин!
Оксана Васильева