Хас биирдии киһи олоҕор кинигэ, хаһыат сүҥкэн оруоллааҕа саарбахтаммат. Оттон харахтарынан инбэлиит буолбут дьоҥҥо бу олоҕу кытта ситимниир, им-балай хараҥаны кыйдыыр биир төһүү күүс.
1977 сылтан саҕалаан Өрөспүүбүлүкэтээҕи көрбөттөр анал бибилэтиэкэлэригэр саҥаны уонна дорҕоону устар устуудьуйатыгар харахтарынан доруобуйалара хааччахтаах дьон билиилэрэ-көрүүлэрэ хаҥыырын туһугар, төрөөбүт тылынан уус-уран айымньылары ааҕан “саҥарар” кинигэ тахсарыгар диктордар, артыыстар, билим үлэһиттэрэ кэлэн, үлэлэспиттэрэ, сыраларын уурбуттара. Ол курдук 2000 сылтан саҕалаан күн бүгүнүгэр диэри саҥарар кинигэлэри ааҕар, библиотека араас бырайыактарыгар көхтөөхтүк кыттар, куруук библиотеканы өйдүүр-өйүүр күндү киһибит, доҕорбут Саха Өрөспүүбүлэкэтин үтүөлээх артыыһа Елизавета Федотовна Потапова буолар. Елизавета Потапова бу сүүрбэттэн тахса сыл тухары ыраас чөллөркөй куолаһынан аахпыт айымньылара ураты сыаналаах фонда буолан, кичэллээхтик хараллар, ааҕааччыларбытыгар күндү бэлэх буолар. Үгүс сыллар тухары кинини диктор быһыытынан үрдүктүк сыаналаан, ааҕааччылар куруутун истиҥник ахтан бэлиэтээн аһараллар. Кини аахпыт аудиокинигэлэрин ааҕааччылар билигин даҕаны дууһаларынан ылынан сөбүлээн ааҕаллар, истэллэр.
Ыам ыйын 8 күнүгэр Былатыан Ойуунускай аатынан Саха тыйаатырыгар Елизавета Федотовна дьоһун үбүлүөйдээх сааһын көрсө айар киэһэтэ буолан ааста. Өрөспүүбүлүкэтээҕи көрбөттөр анал бибилэтиэкэлэрэ бу күн кини аахпыт “саҥарар” кинигэлэрин быыстапкатын киэҥ эйгэҕэ таһааран сырдатта, билиһиннэрдэ. Манна даҕатан бэлиэтиир эбит буоллахха, Елизавета Федотовна уопсайа 232 “саҥарар” кинигэни аахпыта.
Елизавета Федотовна, эн наҕыл, истиҥ, ыраас куоласкын көрбөттөр бибилэтиэкэлэрин ааҕааччылара сахалыы уус-уран айымньылартан, «саҥарар» кинигэлэртэн билэллэр. Саҥаны уонна дорҕоону устар устуудьуйабытыгар өр сылларга дикторынан үлэлээн, «көмүс куоласкын» бэлэхтээбит сүүһүнэн кинигэлэриҥ бибилэтиэкэбит фондатын байыталлар.
Ааҕыы, билии, сайдыы туһугар үтүө тускуллаах үлэҥ, көмөҥ иһин истиҥник махтанан туран, баҕа санаабыт бастыҥын аныыбыт!
Кэрэни кэрэхсиир, үтүөнү үксэтэр ыллыктаах санааҥ сырдыгынан эрэ сыдьаайдын! Бу курдук дьону-сэргэни үөрдэ, искусство алгыстаах аартыгынан саҥаттан-саҥа кыайыыларга айаннатан иһэргэр баҕарабыт!