Илиҥҥи халлааным кырыыта

Эмиэ кыыс иминэн тэтэрдэ,

Ити эн саһарҕаҥ кыыһыыта,

Эҕэрдэ, саҥа күн, эҕэрдэ!

Кэҕэ кыыл чоргуйар саҥата

Кэпсээнин саҕалыыр күөх тыаҕа,

Күн үөһээ ойуутун саҕана

Күөрэгэй уруйдаан барыаҕа.

Талаҕым чыычааҕа таспынан,

Тайаара, тэлээрэ дайыаҕа,

Лабааҕа олорон астына

Тахсар күн ырыатын тардыаҕа.

Ол үүнэр ырыаттан -тойуктан

Уум миэнэ букатын ааһыаҕа,

Аан дойду барыта уһуктан

Арылхай хараҕын аһыаҕа.

Илиҥҥи халлааным кырыыта

Эмиэ кыыс иминэн тэтэрдэ,

Ити эн саһарҕаҥ кыыһыыта,

Эҕэрдэ, саҥа күн, эҕэрдэ!