Ыам ыйын 12 күнүгэр “Мир кино”, ол эбэтэр «Киинэ эйгэтэ» кулууп чэрчитинэн уонна “Сахафильм” киинэ компанията уонна Көрбөттөр анал библиотекалара холбоһук биэчэрдэрэ буолан ааста. Ол курдук Саха литературатын биир бастыҥ классик суруйааччыта Николай Егорович Мординов – Амма Аччыгыйа “Сааскы кэм” диэн эпопея- роман буолбут айымньыта бу саас уус-уран киинэ буолан киэҥ эйгэҕэ таҕыста. Ону тэҥэ “Амма Аччыгыйа”диэн суруйааччы айар үлэтин сырдатар документальнай киинэ сүрэхтэммитэ.

Бу күн киинэ режиссера Тамара Дмитриевна Осипова уонна ХИФУ доцена, “Сааскы кэм” роман диссертациятын ааптара Саргылана Ивановна Егорова кэлэн ыалдьыттаатылар. Онтон көрөөччүлэринэн Николай Егорович айымньыларын сэргиир биһиги активнай ааҕааччыларбыт, эдэр көлүөнэ ыччаттара уонна 3-4 видтаах коррекционнай оскуола оҕолоро кэлэн сэргээн бардылар.  Ыҥырыылаах ыалдьыттарбыт элбэх биллибэтэх, кумаааҕыга тиһиллибэккэ  хаалбыт, Николай Мординов чугас эрэ дьоно билэр чахчыларын кэпсээтилэр, сырдаттылар. Биэчэр ол курдук түргэнник, сүрдээх истиҥник ааста. 

Кычкина Г.М.