«Кыраттан да үөр. Үөр! Үөр үрүҥ күнтэн, үөр мутукча быыһынан тыкпыт сардаҥаттан. Үөр бу Орто Дойдуга тыыннаах үлэлии-хамсыы, айа-тута, таптыы сылдьаргыттан…». Бу этии сырдыгынан сыдьаайар, кэрэни кэрэхсиир далбар хотуҥҥа, Светлана Николаевна Кутуковаҕа олус барсар.
Биир идэлээхпит Намнааҕы кииннэммит бибилэтиэкэ ситимин тутаах үлэһитэ Светлана Николаевна киһи эрэ таптыах курдук кэрэ бэйэлээх куукулалары коллекциялыырын билэн, быыстапка тэрийэр баҕалаах кэпсэппиппитигэр, тута ылыммытыттан олус үөрбүппүт.
Төһөтүн да көрсөн алтыспатарбыт, Светлана Николаевна туһунан бэчээккэ тахсыбыт ыстатыйалартан билсэн, эргиччи талаанынан, хас үүнэр күнү дуоһуйа олорор санаатынан тулалыыр эйгэтин тупсара сылдьар дьонтон биирдэстэрэ буоларын сэрэйэҕин. Ол курдук кини Нам улууһун култууратын бочуоттаах үлэһитэ, улахан дьиэ кэргэн истиҥ-иһирэх ийэтэ, эбэтэ, сатабыллаах хаһаайка, ырыаны-тойугу, чөл олоҕу көҕүлээччи, хоһоонньут, коллекционер, дьикти түгэни хаартыскаҕа үйэтитэр фотограф, уопуттаах турист.
«Оҕо эрдэхпиттэн туох эрэ үчүгэйи, дьэрэкээни, дьиктини сэҥээрэр этим…», – диэн суруйар. Оччолортон, бэйэтин кэмин оҕолорун тэҥэ, киинэ артыыстара хаартыскалаах открыткалары, кэмбиэр мааркаларын, кэмпиэт суутун, испиискэ хаатын ойууларын мунньара. Кэлин бу умсулҕаннаах дьарыгын ыһыктыбакка, араас дьэрэкээн брошкалары, урукку кэм, тас дойду харчыларын уонна саамай дуоһуйан, санаатын ууран туран араас омук куукулалары мунньан саҕалаабыт. Билигин бу 70-тан ордук ахсааннаах баай коллекцията көрбүтү эрэ сөхтөрөр, астыннарар.
Быйыл Арассыыйаҕа биллэриллибит норуоттар сомоҕолоһууларын сылыгар анаммыт тэрээһиннэргэ бу араас омук таҥастаах куукула коллекцията иитэр-үөрэтэр суолтата, көдьүүһэ үрдүүрэ саарбаҕа суох. Быйыл Иван Горнай аатынан көрбөт дьон анал бибилэтиэкэтигэр үһүс төгүлүн кинигэни, ааҕыыны өйүүр “Библиовесна” фестивалбыт муус устар 2 күнүгэр, Оҕо кинигэтин Аан дойдутааҕы күнүгэр, саҕаланна. “Аан дойду куукулалара” быыстапка-коллекция сонун көстүү буолан, ураты эйгэнэн саалабытын толорон бу сааскы маҥнайгы улахан тэрээһин аанын арыйда.
Куукула да, кинигэ да оҕо саас арахсыспат аргыстара: кинилэр иитэр, үөрэтэр, сайыннарар бастыҥ доҕор буолаллар. Ол курдук бибилэтиэкэ үлэһиттэрэ куукулалары араас омук остуоруйаларыгар, айымньыларын дьоруойдарыгар ханыылыы тутан билиһиннэрбиттэрин оҕолор да, төрөппүттэр да сэҥээрэ иһиттилэр. Маныаха эбии норуоттар ырыаларынан сирдэтэн, оҕолор куукулалар дойдуларын таайдылар, төрүт таҥастарын-саптарын туһунан элбэх сонуну истэн, элбэҕи биллилэр-көрдүлэр.
Биир идэлээхпит Светлана Николаевна сэдэх, дьикти коллекциятынан ааҕааччыларбытыгар үгүс үөрүүнү, дуоһуйууну бэлэхтээбиккэр истиҥник махтанабыт. Эн коллекцияҥ өссө хаҥаан, сайдан дьон биһирэбилин ыла турдун!
