Түгэһиир эбээннэрин номоҕо – тифлокомментарийдаах
Саха сиригэр тифлокомментарийдаах испэктээктэр тиһиктэрин быспакка буола тураллар. Хас биирдии сыанаҕа турар испэктээк – туспа суоллаах-иистээх, уопсастыба олоҕор, аныгы театральнай искусство сайдыытыгар улахан суолталаах. Билигин хас биирдии көрөөччү тыйаатыр тыыннаах эйгэтигэр киирэн, испэктээк кэрэтин билэр бырааптаах.
Ол курдук ахсынньы ый 12-13 күннэригэр Хотугу аҕыйах ахсааннаах норуоттар судаарыстыбаннай тыйаатырдарын сыанатыгар «Кыыс Хайа» диэн түгэһиир эбээннэрин номоҕор олоҕурбут испэктээк харахтарынан доруобуйалара хааччахтаах дьоҥҥо турда. Бу – СӨ И.Н. Егоров-Горнай аатынан көрбөт уонна мөлтөхтүк көрөр дьон анал бибилэтиэкэтин уонна Тыйаатыр маҥнайгы бииргэ үлэлэрэ буолар. Бу тэрээһин нэһилиэнньэ бары араҥатыгар инклюзия суолтатын тоһоҕолуур сыаллаах-соруктаах.
Бу күн Тыйаатыр аанын аһан, Бибилэтиэкэ ааҕааччыларын үөрэ-көтө көрүстэ. Испэктээккэ эбээннэр тустарынан, чуолаан Эркэн уонна Нэсэни сэттэ кэрэ кыыс оҕолорун дьылҕалара, кэпсэнэр. Ону таһынан манна эбээн омук ураты үгэстэрэ, сиэрдэрэ-туомнара, өйдөрө-санаалара арыллар. Маны барытын харахтарынан доруобуйалара хааччахтаах көрөөччүлэр тифлокомментарий көмөтүнэн билистилэр: сыанаҕа туох буола турарын биллилэр, бэйэлэрин дьайыы иһигэр баар курдук сананнылар (тифлокомментарий диэн көрөр дьон харахтарынан ылыналларын информацияларын харахтарынан хааччахтаах дьоҥҥо тылынан (эбэтэр суругунан) ойуулааһын буолар. ).
Ыалдьыттар «Кыыс Хайа» испэктээктэн дуоһуйбуттарын, астыммыттарын, дьоруойдар оонньуулара үрдүк таһымнааҕын, тыйаатыр дьиэлии сылаас эйгэлээҕин бэлиэтээн эттилэр. Маннык хабааннаах үлэ култуура уонна искусство бары нэһилиэнньэҕэ тиийимтиэ буоларын туһугар салгыы үлэлиир наадатын бэлиэтиир.
Ол курдук, Хотугу аҕыйах ахсааннаах норуоттар судаарыстыбаннай тыйаатырдарын «Кыыс Хайа» диэн тифлокомментарийдаах испэктээгин премьерата Арассыыйа театральнай искусствотын сайдыытыгар улахан суолталаах хардыыны уонна дойдубут бүтүн култууратын салаатыгар угуйар холобур буолла.
Евгения ПОТАПОВА, библиотекарь, тифлокомментатор
