Көрбөттөр уопсастыбаларын тутаах чилиэнэ, сахалыы Брайль ньыматын айааччы, Саха Островскайа диэн киэн тутта ааттыыр биллиилээх поэппыт Иван Николаевич Егоров-Горнай суруйбут айымньыларын уус ураннаан ааҕар, кини хоһоонноругар суруллубут ырыалары ыллыыр “Егоровскай ааҕыылаар” күрэх маҥнайгытын 2011 сыллаахха ыытыллыбыта. Онтон салҕыы бу айар-кут алгыстаах биэчэрбит Республикатааҕы көрбөттөр анал библиотекаларын сылын аайы ыытыллар үтүө үгэһэ буолбута.
Бу сыл алтынньы ый 20 күнүгэр «Егоровскай ааҕыылар» биэчэр-күрэх 5с төгүлүн эдэр кыттааччылары уонна поэзияҕа умсугуйар, Иван Горнай айымньыларын сэҥээрэр дьону-сэргэни түмтэ.
Быйылгы ааҕыылар хаһааҥҥытааҕар даҕаны элбэх кыттааччыны хомуйбута олуһун үөрдэр, ол курдук бы киэһэ сыанаҕа 52 оҕо тахсан хоһоон аахта, ыллаата-туойда, ону таһынан поэт Иван Горнай айар улэтин уонна хоһооннорун ырыталаата.
Республиканскай коррекционнай интэрнээт-оскуола 1-12 кылааһын үөрэнээччилэрэ уонна 11 нүөмэрдээх «Подснежник» уһуйаан кырачаан иитиллээччилэрэ көхтөөх кыттыыны ылан, сыаналаах бириистэринэн наҕараадалананнылар. Уус-ураннаан хоһоону ааҕар, ырыа толорор талааннарын арыйан улаханнык астыннылар уонна толору саала көрөөччүлэргэ, дьүүллүүр сүбэ чилиэттэригэр үгүс үөрүүнү бэлэхтээтилэр. Бу күрэх кыттыылаахтарын сыаналаатылар дьүүллүүр сүбэ: Павлов Борис Иванович, суруйааччы, Россия суруналыыстарын түмсүүтүн чилиэнэ, «Көмүөл» кинигэ кыһатын дириэктэрэ, Постников Александр Федорович-Сындыыс, «Байанай» сурунаал эрэдээктэрэ, ВГТРК «Вести-Саха» общественнай корреспондена, Саха Республикатын уонна Россия суруналыыстарын түмсүүтүн чилиэнэ уонна Охотина Наталья Андреевна, көрбөттөр анал библиотекаларын тифлоинформационнай-издательскай салаа сэбиэдиссэйэ, «Көмүлүөк» сурунаал эрэдээктэрэ.
Күрэх түмүгүнэн кыайыылаахтарынан Марк Матвичук, “Подснежник” уһуйаан иитиллээччитэ уонна Пахомов Алексей, 2 «В» кылаас, Митрофанова Галина, 8 «Б» кылаас үөрэнээччилэрэ буоллулар.
Евдокия Герасимова
