Саха Автономията төрүттэммитэ үбүлүөйдээх 100 сылын көрсө Өрөспүүбүлүкэтээҕи көрбөттөр анал библиотекалара «Сахам сирин сүрэхпинэн көрөбүн” диэн брайль сириибинэн серия кинигэтин сүрэхтээтэ. Кинигэ туһунан кылгастык билиһиннэрдэххэ, манна Сахабыт сирин 34 улууһун уонна дойдубут тэбэр сүрэҕин Дьокуускай куорат туһунан кэпсэнэр. Хас биирдии улуус историятыттан, олоҕуттан-дьаһаҕыттан уонна чулуу дьонун-сэргэтин кэпсиир дьоһун айымньы үс төгүрүк сыл уһаарыллан, таҥыллан уопсайа 35 кинигэ буолан киэҥ эйгэҕэ таҕыста.
Кинигэ сүрэхтэниитэ муус устар 26 күнүгэр буолан ааста. Бу үөрүүлээх быһыыга-майгыга библиотека ааҕааччылара, кинигэни сүгүрүйээччилэр бука бары тоҕуоруһа муһуннулар. Биэчэрбитин саха эстрадатын чаҕылхай сулуһа, норуот таптыыр ырыаһыта Аскалон Павлов, саҥа тахсан эрэр эдэр сулус Күн Сол уонна Саха государственнай филармониятын хора киэргэттэ. Бу күн “Вековая история Якутии в лицах: 1922-2022” диэн эмиэ серия кинигэ бастакы чааһа сүрэхтэннэ. Маны таһынан Саха сирин тактильнай каартатын ааҕааччылар биһирии көрдүлэр.
Өрөспүүбүлүкэтээҕи көрбөттөр анал библиотекалара олох сайдыытын тэтиминэн ааҕааччыларыгар куруук саҥаны, интэриэһинэйи билиһиннэр, оҥорор үтүө соруктаах үлэлиир.
Оксана Саввинова