Ахсынньы ый 13 күнүгэр “Интэриэһинэй көрсүһүү” кулууп чэрчитинэн биһиэхэ Уус Алдан улууһуттан Иннокентий Иннокентьевич Борисов кэлэн сэргэх сэһэннээх күндү ыалдьыт буолла. Дьэ хаһан, хайдах библиотекабыт бу эдэр киһилиин алтыспыта буоллар диэн ыйытыы үөскээбит буоллаҕына кэпсиибит…
Быйыл күн чаҕылыччы тыгар кэмигэр, дьыл кэмэ саас эрдэҕинэ биһиги библиотекарьдар уруккуттан сүрэхпитигэр-быарбытыгар иитиэхтэммит улахан баҕа санаабытын Иннокентийдыын үллэһиннибит. Ол санаабыт ааҕааччыларбыт туһунан клип устуу этэ. Маҥнай “Махтал куораппытыгар” диэн идеялааҕа, онтон кэлин тэнийэн кэҥээн “Мир на ощупь” диэн улахан социальнай бырайыакка уларыйбыта. Сүрүн сыалбытынан ааҕааччыларбыт олохторун-дьаһахтарын, дьарыктарын, сылдьар, олорор эйгэлэрин киэҥ уопсастыбаҕа көрдөрүү, билиһиннэрии буолар. Хайа баҕарар клипка актердаах, сценаристаах, оператордаах, уот тутан сырдатар дьонноох буоллаллар. Биһиги ыраата барбакка библиотекабыт үлэһиттэрин, оҕолорун уонна билэр дьоммутун кытталларыгар көрдөстүбүт. Ол курдук ийэ оруолун библиотекарь София Черкашина, аҕа оруолун биир дойдулааҕым Уус-Алдантан төрүттээх Иван Борисов уонна оҕолор оруолларын библиотекарь Евдокия Николаевна төрөппүт уола Артем Менкяров, быраата Вова Герасимов толордулар. Икки сыралаах күн иһигэр устан бүтэрбиппит. Монтаһын Госкинохранилещалары кытары тэҥҥэ оҥорбуппут. Манна даҕатан эттэххэ, клип устар мээнэҕэ дьыала буолбатах, олус бириинчик элбэх сыраны, болҕомтону ирдиир үлэ эбит. Үлэбит түмүгэ сэтинньи ый 13 күнүгэр, норуоттар икки ардыларынааҕы көрбөттөр күннэригэр НВК каналыгар көстөн олуһун үөрдүбүт.
Бу киэһэ режиссербутун уонна актердарбытын барыларын ыҥыран, чиэстээн, сэмэй бэлэх туттаран көрүстүбүт. Ону тэҥэ Иннокентий “Истиэҥ дуо эн миигин” диэн саҥарбат, истибэт уол туһунан сүрдээх истиҥ киинэтин тифлокомментарийдаан ааҕааччыларбытыгар көрдөрдүбүт. Ааҕааччыларбыт сыралаах үлэбитин бэлиэтээн, маннык бырайыак улахан суолтатын тоһоҕолоон эттилэр. Онон кынат анньынан инникитин даҕаны Иннокентий Иннокентьевичтыын араас саҥа бырайыактары олоххо киллэрэр санаа баар.
Оксана Васильева
