Сэтинньи 15 күнүгэр “Интэриэһинэй көрсүһүүлэр” кулууп чэрчитинэн “Чолбон” сурунаал кылаабынай редактора Данил Николаевич Макеев уонна кириитикэ, библиография салаатын сэбиэдиссэйэ Иван Иванович Осипов — Уйбаан Ойуур ыалдьыттаан аастылар. Историяттан сырдаттахха, «Чолбон» уус-уран литературнай, уопсастыбаннай-политическай сурунаал 1926 с. сэтинньитигэр бастакы нүөмэрэ тахсыбыта.  Бу сыллар тухары хас биирдии саха ыалыгар кэтэһиилээх күндү ыалдьыт буолан кэлбит «Кыһыл ыллык», «Хотугу сулус», «Чолбон» сурунааллар үгүс көлүөнэни ситимнииллэр, история тыыннаах кэрэһитэ буола сылдьаллар. Саха үгүс суруйааччылара үүнэн-сайдан тахсалларыгар “Чолбон” сурунаал бигэ тирэх, бастакы үктэл буолбута саарбаҕа суох.

Библиотека айар талааннаах ааҕаччылара И.П.Кононов-Бөртө уола уонна М.П. Емельянов эмиэ бу сурунаалга бэчээттэнэн турардаахтар.  Бу күн ыҥырыылаах ыалдьыттар ааҕааччыларбытын кытта атах тэпсэн олорон уруккуну-хойуккуну ахтыстылар, интэриэһиргиир боппуруостарга толору олохтоох эппиэттэри биэрдилэр. Биир тыланан бу көрсүһүүттэн элбэх саҥаны иһиттибит-биллибит.

Саха норуотун кутун-сүрүн туппут, омук быһыытынан өйбүт-санаабыт сүмэтэ түмүллэр сурунаала өссө да сайда, чэчирии турдун диэн баҕа санаабыт бастыҥын тиэрдэбит.

Охлопкова М.Е.