Олоҥхолоон оҕонньор барахсан
Оллоонноон олорон эрэ
Олоҥхо номоҕо оҥостон,
Аан ийэ дайды айыллыбытын,
Алаҕаркаан – тэтэгэркээн
Алта араҥас далбардаммытын
Дьэрэкээн ойуу курдук
Дьаргэлдьитэн түстэҕинэ,
Эриэккэстик этэн – тыынан
Эҕилдьитэн киирдэҕинэ –
Унаар – мунаар көрбүт
Урааҥхай саха барахсан
Нохтоолоох тойон сүрэҕэ долгуйан
“Ноо!” — диирэ эбитэ үһү.
П.А. Ойуунускай
Биһиги өрөспүүбүлүкэбитигэр сыллата Олоҥхо күнүгэр аналлаах декаданы ыытыы үтүө үгэс буолла. Ол курдук, аҥаардас кэнники үс сылга Олоҥхо декадатын кэмигэр 10-нан тыһыынчаттан тахса киһини хабан, 50-чалыыга тиийэр, олоҥхоҕо аналлаах научнай-практическай кэмпириэнсийэлэрдээх, быыстапкалардаах, куонкурустардаах, дьүһүйүүлэрдээх, испэктээхтэрдээх, араас эгэлгэ тэрээһиннэр ыытыллаллар.
Саха норуотун киэн туттуута, иннигэр уктар баайа – олоҥхо Аан дойдуга биллэн, ЮНЕСКО биһирэбилин ылбытыгар Уус Алдан улууһун улуу олоҥхоһута Дмитрий Михайлович Говоров-Олоҥхоһут Миитэрэй киллэрбит кылаата муҥура суох.
Быйылгы декада чэрчитинэн, Көрбөттөр анал библиотекалара “Алаас” кырдьаҕастар дьиэлэрин олохтоохторугар анаан, Д.М. Говоров-Олоҥхоһут Миитэрэй төрөөбүтэ 170 сылыгар аналлаах тэрээһини ыытта. Олоҥхоһут Миитэрэй 95 сааһыгар диэри олорбута, онон олоҥхону киэҥник суруйуу кэмигэр, репертуарын сороҕун да буоллар, сурукка түһэрбитэ: «Баһымньы Баатыр», «Хаан Дьааһын», «Кыыс Ньургун», «Хахсааттыыр Хадан Буурай”. Биһиги библиотекабыт Дмитрий Михайлович норуокка киэҥ билиниини ылбыт «Бүдүрүйбэт Мүлдьү Бөҕө» айымньытын көрбөттөр ширииптэринэн Брайль систиэмэтинэн биэс кинигэлээх оҥорон таһаарбыта. Олохтоохторго анаан Олоҥхоһут Миитэрэй олоҕун кэпсээтибит, айымньыларын сырдатар кинигэ выставкатын билиһиннэрдибит уонна “Олоҥхо ытык эйгэтэ” викторина ыыттыбыт. Кинигэни умсугуйан ааҕар аҕам саастаах дьоннорбут биһиги ыытар тэрээһиммитигэр көхтөөхтүк кытыннылар, викторина кыайыылаахтарыгар кыракый бириистэрбитин туттартаатыбыт. Олохтоохтор оҕо сылдьан биһирии истибит олоҥхоһуттарын ахтан – санаан аастылар. Былыргы культурабытын, өбүгэлэрбит үтүө үгэстэрин харыстыаҕыҥ, норуоппут тылынан баайын үйэтитэ туруоҕуҥ диэн алгыс тылларын анаатылар.
Пухова С.И., библиотекарь
