Ырыа барахсан истиҥ иэйииттэн, ис сүрэхтэн тахсар сүдү кылаат буоллаҕа. Ырыа үөрүүнү үксэтэр, санааны сайҕыыр, ыар баттыгы киэр кыйдыыр дьикти алыптаах, ураты умсулҕаннаах сүдү айымньы.
Ол курдук сэтинньи 22 күнүгэр композитор – мелодист, СР култууратын туйгуна, үтүөлээх үлэһитэ Алексей Кириллович Калининскай – Луҥха Өлөксөйө 65 сааһыгар аналлаах Өрөспүүбүлүкэтээҕи ырыа күрэҕэ буолан ааста. Бу күрэхпит Саха өрөспүүбүлүкэтин бастакы президенин Михаил Ефимович Николаев “Музыка для всех” диэн сүдү бырайыагар олоҕуран тэрилиннэ. Манна даҕатан бэлиэтиир буоллахха, Өрөпүүбүлүкэтээҕи көрбөттөр анал библиотекалара бу бырайыак чэрчитинэн ааспыт 2014 уонна 2016 сылларыгар инструменталистар күрэхтэрин тэрийэн ыыппыта.
Алексей Кириллович библиотека истиҥ доҕоро, үтүө сүбэһитэ, өр сылларга ырыа ымыылаах “Сайдыы” кулууппут эрэллээх салайааччыта. Бииргэ үлэлээбит, алтыспыт сылларбыт тухары уопсастыбабыт элбэх чилиэттэрин сырдык талааннарын арыйбыта, ырыа кэрэ эйгэтигэр угуйбута. Кини ырыаларыгар дьикти тыыннаах айылҕа суугуна, дьылҕа-хаан оҥоһуутугар бэринэн суланыы биир да ырыаҕа иһиллибэт, онон ырыалар бары дьоллоох олоххо уруй-айхал курдук иһиллэллэр, уостубат төлөнү бэлэх ууналлар… Луҥха Өлөксөйө тыыннаах ырыалара бүтүн өрөспүүбүлүкэ үрдүнэн, сүүһүнэн тыһыынча киһи сүрэҕэр ыллана, үтүөҕэ, сырдыкка угуйа турдахтара. Үйэлээх айымньы диэн дэлэҕэ да этэн эрдэхтэрэ эбээт!
Быйылгы күрэх Алексей Калининскай “Кэрэҕэ аналбыт” диэн ырыатын аатынан сүрэхтэннэ. Куонкуруска киэҥ далай Сахабыт сирин ыраах-чугас улуустарыттан кыттыыны ыллылар. Ол курдук талыы талба Тааттаттан, киэҥ – нэлэмэн Кэбээйиттэн, Эркээни хочолоох Хаҥаластан уонна Дьокуускай куорат ырыа куттаах, айар талааннаах ааҕааччыларбыт бу дьоро киэһэни ыллам ырыаларынан киэргэттилэр. Хас биирдии кыттааччы Луҥха Өлөксөйө айымньытыттан уонна биир талбыт сөбүлүүр ырыаларын толордулар. Куонкурус дьүүллүүр сүбэтин чилиэттэринэн Өрөспүүбүлүкэтээҕи көрбөттөр анал библиотекаларын директора Е. Н. Находкина, Дьокуускайдааҕы көрбөттөр уопсастыбаларын бэрэссэдээтэлин солбуйааччыта Р. Р. Данилов, Өрөспүүбүлүкэтээҕи профессиональнай уонна медико-социальнай реабилитация техникум-интернатын социокультарнай реабилитациялыыр салаа салаайааччыта Л. Н. Попова уонна бэрэссэдээтэлинэн Алексей Кириллович Калининскай бэйэтэ буолла. Дьоро киэһэбит түмүгэр кыайыылаах үрдүк аатынан, ол эбэтэр гран-при хаһаайкатынан Дьокуускай куораттан көмүс куоластаах Туйаара Игнатьева эрэллээхтик бастаата.
Оксана Васильева
