Олунньу 15 күнүгэр И.М.Сосин аатынан Мэҥэ-Хаҥаластааҕы киин библиотекаҕа төрөөбүт тыл, сахалыы сурук-бичик күнүн бэлиэтиир нэдиэлэ чэрчитинэн «Т.О.К.» интеллектуальнай оонньуу улуустааҕы көрбөттөр обществоларын, итиэннэ үһүс көлүөнэ оскуолатын чилиэннэригэр анаан ыытылынна. ТОК оонньуу сүрүн сыалынан — соругунан төрөөбүт тылга тапталы иҥэрии, интэриэһи көбүтүү, тыл кэрэтин, эгэлгэтин өйдүүргэ уһуйуу, толкуйдуур дьоҕуру сайыннарыы буолар.

Ооонньууга ирдэбил быһыытынан биир хамаандаттан 6-лыы киһи кыттыыны ылла. Уопсайа 6 түһүмэххэ хамаандалар тыҥааһыннаахтык күрэхтэстилэр. Икки хамаанда бэйэлэригэр аат уонна девиз толкуйдаан көхтөөхтүк кыттан, тобуллаҕас өйдөөхтөрүнэн көрөөччүлэри сөхтөрдүлэр. Оонньуу ыйытыктара саха литературатыгар, олоҥхо геройдарыгар, суруйааччыларга ананна.   

Дьүүллүүр сүбэ кыайыылаахтары быһаарар кэмигэр кыттааччылар бэйэлэрэ суруйбут хоһооннорун ааҕан иһитиннэрдилэр, сайаҕас ырыаларын бэлэхтээтилэр. Түмүккэ үһүс көлүөнэ оскуолатын аҕам саастаахтара кыайыылааҕынан тахсан кыайыы өрөгөйүн биллилэр. Үһүс көлүөнэ оскуолатын итиэннэ улуустааҕы көрбөттөр обществоларын чилиэннэрэ инникитин араас хабааннаах тэрээһиннэри тэрийэргэ библиотекардарга сонун этиилэри киллэрдилэр.

Марина Трифонова, Мэҥэ-Хаҥаластааҕы киин библиотекатын сүрүннүүр үлэһитэ