Халлааммыт сылыйан, дьон үөрэн, сүргэтэ көтөҕүллэн, санаалара сырдаан, таһырдьа сылдьаллара элбээтэ. Ол курдук, кулун тутар 14 күнүгэр, күнүс үс чаастан өрөспүүбүлүкэтээҕи көрбөттөр анал бибилэтиэкэлэригэр, айар куттаах, хоһоон, ырыа алыптаах “Уран тыл оһуора” түмсүү иһирэх көрсүһүүгэ сырыттыбыт. Салайааччы Раиса Николаевна Тимофеева – Михайлова, Прасковья Алексеевна Тумусова – Туску, Анастасия Федоровна Болтокова – Дьолууна, Марфа Александровна Харитонова – Чөмчүүнэ кыттыыны ыллыбыт. Бибилэтиэкэ үлэһиттэрэ Матрена Егоровна, Светлана Ивановна кэлбит дьону үөрэ – көтө көрүстүлэр. Сырдык, ыраас, саҥа тутуулаах ааҕар алаһаҕа кинигэ, хаһыат баар саалатыгар киирэн, бэлэмнээбит остуолларыгар олорон, кэпсэтиибитин билсиһииттэн саҕалаатыбыт. Кылгастык түмсүү туһунан кэпсээтэххэ, былырыын, олунньу 8 күнүгэр 2018 сылга тэриллэн үлэбитин саҕалаабыппыт. Биир сыл иһигэр үс улахан бырайыак, сүүрбэ биэс кинигэ, 12 киһи хомуурунньуктара таҕыстылар, элбэх көрсүһүүлэр, хаһыаттарга сырдатыы уонна икки презентация оҥордубут.

          Хас биирдиибит туран хантан сылдьарбытын, хаһан суруйан саҕалаабыппытын, айан суруйбут сахалыы алыптаах хоһооннорбутун аахтыбыт. Дьолууна байаанынан бэйэтин ырыаларын ыллаан кэлбит дьон санааларын көтөхтө. Олус диэн сэргээн иһиттилэр, ытыс тыаһынан махталларын тириэртилэр. Бибилэтиэкэ үлэһиттэрэ кэлбит дьоҥҥо барыларыгар сибэкки дьөрбөтүн бэлэхтээтилэр, түмсүү салайааччытыгар махтал сурук туттардылар. “Уран тыл оһуора” түмсүү аатыттан бибилэтиэкэҕэ саҥа бэчээттэнэн тахсыбыт үс хоһоон хомуурунньугун, биир ырыанньыгы бэлэх ууннубут, махтал сурук туттардыбыт. Бүтүүтүгэр бары хаартыскаҕа түстүбүт. Үчүгэй тэрээһин, иһирэх көрсүһүү санаабытын кынаттаан, бары да үөрэммит, дьиэбитигэр тарҕастыбыт.

                         “Уран тыл оһуора” түмсүү салайааччыта Раиса Тимофеева – Михайлова