ССРС, СӨ культуратын туйгуна, Горнай улууһун Бочуоттаах олохтооҕо, улууска библиотечнай дьыала сайдыытыгар улахан кылааты киллэрбит Татьяна Петровна Саввинова туһунан чугас дьонун, аймахтарын, доҕотторун, үөлээннээхтэрин, биир идэлээхтэрин истиҥ ахтыылара уонна Татьяна Петровна бэйэтин суруйуулара, ырыа буолбут хоһоонноро түмүллүбүт “Татыйаас” диэн кинигэ сүрэхтэниитигэр Республикатааҕы көрбөттөр анал библиотекаларын директора Е.Н. Находкина уонна кэтэхтэн абонемент библиотиэкэрэ С.И. Пухова кыттыыны ылан кэллибит.
Биһиги Горнайдааҕы кииннэммит библиотечнай ситими кытта 2000 сылтан саҕалаан хараҕынан мөлтөхтүк көрөр дьону “саҥарар” кинигэнэн хааччыйыыга уонна кинилэр духуобунай сайдыылаах буолалларын ситиһэр сыалтан, дуогабар түһэрсэн ыкса үлэлиибит. Бу сыллар усталарын тухары Татьяна Петровналыын айымньылаахтык, таһаарыылаахтык үлэлээбиппит диэн бэлиэтиир оруннаах. Арааһынай тэрээһиннэри, көрсүһүүлэри, ыһыахтары, республиканскай таһымнаах литературнай күрэхтэри Горнай улууһун көрбөт (салайааччы Дьяконов Р.В.) ааҕааччыларыгар анаан, иилээн – саҕалаан ыытабыт. Манна барытыгар Татьяна Петровна кыһамньылаах үлэтэ Көрбөттөр анал библиотекаларын грамоталарынан, махтал суруктарынан бэлиэтэммитэ. Татьяна Петровна киэҥэ – холкута, кыһамньыта, сыанабыла, эйэҕэһэ – сайаҕаһа хараҕынан күөмчүлэммит ааҕааччылар махталларын ылбыта.
Биир идэлээхпит, үтүө сүбэһиппит, кэрэ киһи – Татьяна Петровна туһунан куруук ахта – саныы сылдьыахпыт…
Пухова С.И.