«Саха тыла — саха тыына»: төрөөбүт төрүт тыл күнүгэр аналлаах сахалыы Брайль систиэмэтинэн сурук-бичик уонна ааҕыы күрэҕэ

Сахалыы тылынан Брайль ньыматынан ааҕыы уонна суруйуу күрэҕэ сылын аайы ыытыллар. Бу күрэх быйыл 6 төгүлүн ыытыллан, үтүө үгэспит буолла.

Мэлдьитин буоларын курдук улахан дьон икки бөлөххө арахсан, “Күүстээх” уонна “Кэскиллээх” диэн, күрэхтэстиллэр. Оҕолор “Орто сүһүөх” (5-тэн 8-с кылааска диэри), иккис бөлөх «Үрдүкү кылаас үөрэнээччилэрэ» диэн арахсан кыттыыны ылаллар.

Быйылгы күрэхпит, балаһыанньаҕа сурулла сылдьарынан, суругунан үлэ, ол эбэтэр диктант, быһыытынан барда. Оттон ааҕыыга саха буойун суруйааччыларын айымньыларыттан быһа тардыыны аахтылар.

Күрэх, брайлистар этиилэрин ылынан, бу сыл ааҕыыга уонна суруйууга тус-туспа сыаналаныа. Ол эбэтэр ааҕыыга уонна суруйууга 1, 2, 3 миэстэлэр олохтонуохтара.

Күрэх түмүгүн кытта олунньу 27 күнүгэр научно-познавательнай лекторий чэрчитинэн Сергей Афанасьевич Зверев-Кыыл Уола төрөөбүтэ 120 сылыгар аналлаах тэрээһиҥҥэ билиһиннэриэхпит.

Жюри чилиэттэрэ — Кычкина Галина Михайловна, Герасимова Евдокия Николаевна, бэрэссэдээтэл — Фомин Дмитрий Матвеевич.