«Олохпут уйгулаах үүнүүтүн
Оччугуй ырыаһыта кимий диэтэргит,
Ол мин сүрэҕим этэ.
Кини кэлэр кэскилгэ
Кэрэ кэмҥэ үөрэн,
Көҥдөй агдам иһиттэм
Күөгү күмүс күөмэйбинэн
Көтөн-дайан тахсан,
Чыычаах буолан тырыбынаата,
Ымыы буолан ыллаабыта,
Алгыстаах олоҕу
Аан дойду кэскилин айхаллаабыта… »
Сергей Зверев – Кыыл Уола
Быйыл саха норуотун кутун-сүрүн бэйэтин өйүгэр-санаатыгар сөҥөрдүбүт, саха төрүт култууратыгар сүппэт сүдү бэлиэни хаалларбыт, дэгиттэр талааннаах, РСФСР култууратын үтүөлээх үлэһитэ, Саха АССР ускуустубатын үтүөлээх деятелэ, ССРС суруйааччыларын Сойууһун чилиэнэ, икки Үлэ Кыһыл Знамятын кавалера, кэрэ чуор кылыһахтаах тойуксут, бэйиэт, драматург, оһуокайдьыт, олоҥхоһут Сергей Зверев – Кыыл Уола 120 сааһын бэлиэтиибит.
Олунньу 27 күнүгэр, ааҕааччыларбытыгар анаан билиини, сырдыгы саҕар сыаллаах ыытыллар лекциялар чэрчилэринэн, истиҥ-иһирэх кэпсэтии ыытылынна. Бүгүҥҥү көрсүһүүбүт маанылаах ыалдьыта Сергей Афанасьевич Зверев төрөппүт уола Төгүл Афанасьевич Зверев.
Сэдэхтик көстөр сүдү талааннаах Ытык киһи – Кыыл Уолун эриэккэс олоҕун, айар үлэтин туһунан Төгүл Сергеевич сэргэх кэпсээниттэн “Аар тайҕа ырыаһыта С.А. Зверев-Кыыл Уола” кинигэ быыстапкатын нөҥүө тэрээһин кыттыылаахтара сонуну саҥаны биллилэр.
Кыыл Уолун төрдүн-ууһун, төрөөбүт дойдутун, ырыаҕа-тойукка уһуйуллуутун, айар үлэтин, дьиэ кэргэнин туһунан ааҕааччылар ыйытыыларыгар хоруй ылан астына тарҕастылар.
Библиотекабыт бастыҥ ааҕааччыта, Дьокуускайдааҕы культпросвет училище 1985 сыллааҕы выпускнига, Эдуард Григорьевич Колодезников уонна Слепцова Антонина Семеновна народнай инструменнарга уһуйбут учууталларыгар Төгүл Сергеевич Зверевка олус истиҥник, сылаастык махтал тылларын эттилэр.
Ити курдук, Өрөспүүбүлүкэтээҕи көрбөттөр анал библиотекалара, саха тылын сүмэтин, төрүт үгэстэрин иҥэриммит, айылҕаттан айдарыылаах Сергей Афанасьевич Зверев үбүлүөйдээх сылыгар анаммыт тэрээһининэн олунньу – Ийэ тыл ыйын түмүктээтэ.
Ульяна Чичигинарова