АТЫЫҺЫТ

Мин оҕом — атыыһыт,

Мин оҕом — буруокар,

Булууһук-талыыһык,

Киһи диэн бу буолар.

 

Оннооҕор маллары

Омуктан аҕалтыыр,

Арыы-сыа аллары

Аны дьон айхаллыыр.

 

Хас киирбит хараҕа

Хатанар бу баайга:

Телик да, видик да

Дэлэй бу ырайга.

 

Манна баай арааһа

Барыта баар сирэ,

Арай дьэ, арааһа,

Адьас суох кинигэ…

 

Кинигэ эҥин диэн,

Ол туохха наадалаах

Атыыһыт киһи диэн

Атыны ааҕыахтаах.