Доҕоттоор, туруйа тойугунуу
Доллоһута туойуоҕуҥ эрэ:
Дойдубут сибэкки толоонунуу
Долгуйа сытара оо, кэрэ!
Оол ыраах, уон өрүс ортотугар,
Муора курдук модуннук уста,
Олоҥхо Дойдутун үөс хоруга
Улуу Өлүөнэ ууна сытар.
Кини хочолоро уйгу быйаҥ
Отунан-маһынан киэргииллэр,
Кини долгуннарын күҥҥэ ыһа
Көмүс балыктара сэмсииллэр.
Былыр саха быстыбат быатыгар
Бу үтүо өрүһү буллаҕа,
Кини сыһыыларыгар, тыатыгар
Бултаан-алтаан киһи буоллаҕа.
Өлүөнэ эбэбит, биһиэхэ эн
Өбүгэ саҕаттан күндүгүн,
Эн эрэл, дьол уотун күлүмүнэн
Күндээрэ устаҕын өрүүтүн.
Үчүгэй даҕаны дьиэлээн иһэр
Үс саха үөрүүтүн саҕана!
Төрөөбүт сиргэр, дьоҥҥор-сэргэҕэр
Үөскүүр, үүнэр таптал нарына.
Доҕоттор, туруйа тойугунуу
Доллоһута туойуоҕуҥ эрэ:
Дойдубут сибэкки толоонунуу
Долгуйа сытара оо, кэрэ!