Тыһыынча сылларга тымныыны-тыаллары
Тыыннарын суоһунан сылытан олорбут,
Уонунан омуктар улуукан сыалларын
Олохтуу, оҥоро уоҕуран турдубут.
Барҕар эн, бар дьону долгута,
Баараҕай көҥүл, кэрэ
Уйгулаах олоҥхо дойдута,
Саргылаах Сахам сирэ!
Үөрэҕи, сырдыгы, үүнүүнү-сайдыыны
Үлэһит былааһа биһиэхэ биэрбитэ.
Өлүүнү-сүтүүнү, үөрүүнү, кыайыыны
Өлүөнэ биэрэгэр үс саха билбитэ.
Барҕар эн, бар дьону долгута,
Баараҕай, көҥүл, кэрэ
Уйгулаах олоҥхо дойдута,
Саргылаах Сахам сирэ!
Доҕордуу норуоттар дьоллорун туһугар
Дьон-сэргэ барыта дьулуурун анаатын,
Өй-санаа үтүөтэ үүнүүбүт суолугар,
Үрүҥ күн кэриэтэ, өрүүтүн сырдаатын.
Барҕар эн, бар дьону долгута,
Баараҕай, көҥүл, кэрэ
Уйгулаах олоҥхо дойдута,
Саргылаах Сахам сирэ.