Кутуйах бурдук куолаһын
Хороонугар таһынар,
Куртуйах от-мас туораҕын
Куолаҕыгар мунньунар —
Түбэһиэх дуо ол барыта,
Төрүөттээх дуу, ол барыта?
Өбүгэлэр бу ис тыынын
Өйдүү охсон ылбыттар,
Өртөн ыла хаһааныыны
Үтүө үгэс гыммыттар —
Оруннаах дуо ол барыта,
Омуннаах дуу, ол барыта?
Сылгы иһин сыалай ууран,
Сылы быһа хаһааныы,
Сыһыы-толоон хаара ууллан,
Сыһык эти алдьатыы —
Хаһан этэй ол барыта,
Хайдах этэй, ол барыта?
Хастыы да сыл ампаар иинин
Хайаҕынан толоруу,
Хара күһүн буолуор диэри
Хаһааһынан олоруу —
Хаһан этэй ол барыта,
Ханна этэй, ол барыта?
Үөттэринэн, бэстэринэн
Өрө үүммүт тыаларга,
Өбүгэлэр үгэстэрин
Өйдүү сылдьар ыаларга
Өссө тыыннаах ол барыта,
Өлө или кол барыта.