Хиросима, Нагасаки –
Сүрэх оспот баастара…
Эмиэ аймыыллар санааны
Куолакаллар тыастара.
Истиҥ эрэ, бары истиҥ,
Истиҥ набат дорҕоонун:
Олох иһин, олох иһин
Устар эйэ долгунун.
Истиҥ аҕа баһылыктар,
Албын тылга саһымаҥ,
Бэйэҕитин кытта ылар
Өлүү иинин хаһымаҥ!
Истиҥ, улуу ученайдар,
Атом күүһүн баһыйан,
Сири-халлааны уматар
Сэрии сэбин айымаҥ!
Истиҥ эрэ, сир дьонноро,
Ядернай сэрии суоһун
Сир үрдүттэн суох оҥоро,
Долгун буолан туруоҕуҥ!