Сэтинньи 5 күнүгэр «Үрүҥ торуоска» акция чэрчитинэн интернет ситимин нөҥүө ZOOM программанан эдэр талааннаах ырыаһыттары кытта көрсүһүү буолан ааста. Ол курдук Мичил Моисеев, Рома Винокуров уонна Айыылана Степанова бэйэлэрин сүгүрүйээччилэрин кытта аһаҕас эфиргэ тахсан дьону-сэргэни сэргэхситтилэр.
Көрсүһүүбүт аһаҕас кэпсэтии быһыытынан барда. Оҕолор бэйэлэрин, хантан төрүттээхтэрин, дьиэ кэргэннэрин, үөрэхтэрин тустарынан сырдаттылар, чопчулаан кэпсээтилэр. Мичил быйыл үөрэҕин бүтэрэр эппиэтинэстээх сыла эбит. Рома Курскайдааҕы музыкальнай училище байаан салаатын устудьуона, атын куоракка үөрэнэр хайдаҕын туһунан ыйытыыбытыгар, “Бастаан ыарахаттар бааллар этэ, онтон утаа киһи үөрэннэҕинэ санаа хоту табыллан иһэр эбит”, – диэн бэйэтин санаатын эттэ. Айыылана номнуо 9 кылаас үөрэнээччитэ, бэрт ситиһиилээхтик бастакы чиэппэрин түмүктээн каникулугар сынньана сылдьар.
Ону таһынан ырыа эйгэтигэр туох былааннаахтарын сурастыбыт, хайдах ырыалары истэллэрин, толороллорун, ханнык муусука инструменыгар оонньуулларын кэпсээтилэр. Кэм уларыйан иһэр, араас омук тылынан ырыалар тахса тураллар, ону кытта биһиги эмиэ сайдабыт, атын тылынан аныгылыы ырыалары иһиттэрбит даҕаны, сахалыы ырыабытын куруук илдьэ сылдьабыт диэн биһиги ыалдьыттарбыт санааларын кытта үллэстэллэр.
Айыылана бу аҕыйах хонуктааҕыта Москуба куоракка баран «Белая трость» фестивальга кыттан, Россия эстрадатын сулуһун, Анита Цой ырыаһыты кытта дуэттаата. “Быйыл бу дьаҥ ыарыы турарынан сибээстээн, кэнсиэр көрөөччүтэ суох, быһа эфир быһыытынан тэриллэн ааспыт эбит. Ол да буоллар, төһө да тыыннаах көрөөччүтэ суох буоллар, элбэх устар камера иннигэр ыллыыр долгутуулаах эбит. Анита Цой олус үчүгэйдик, сэмэйдик көрүстэ, икки музыкальнай альбомун бэлэх уунна”, – диэн Айыылана кэпсиир.
Мичил бииргэ төрөөбүт быраатынаан, Кыыдаанныын, Саха сирин Ийэлэрин күнүгэр бэлэх быһыытынан Александр Самсонов-Айыы Уола репертуарыттан “Ийэбэр” диэн ыарыыны Антон Иванов салайааччылаах «Добун» устуудьуйаҕа уһуллубуттарын туһунан кэпсээтэ. Бу ырыаҕа клип олус табыллан элбэх көрөөччүнү долгутан турардаах.
Онтон биһиги истээччилэрбит олус көхтөөхтүк кытыннылар, интириэһиргиир боппуруостарын чат нөҥүө ыытан уонна араас истиҥ тыллардаах баҕа санаалары суруйан хааллардылар: «Оҕолор наһаа маладьыастар”, “Элбэх оҕоҕо, ыччакка холобур буолаҕыт”, “Инникитин ситиһии эрэ сиэттистин!”, “Эһиги талааҥҥытыгар сүгүрүйэбит”, “Наһаа да үчүгэй тэрээһин, дууһалыын сынньанныбыт”. Бу курдук араас истиҥ тыллардаах суруктары тутаммыт, оҕолор да, библиотека да үлэһиттэрэ астынныбыт, сүргэбит көтөҕүлүннэ.
Кэпсэтиибит түмүгэр ыалдьыттарбыт биирдии ырыаны бэлэхтээн истээччилэрин үөртүлэр. Рома Виктор Цой репертуарыттан «Звезда по имени Солнце», Айыылана Александр Самсонов-Айыы Уола репертуарыттан «Сардаана», Мичил Василий Слепцов репертуарыттан «Тохтоомо, мин ырыам матыыба» диэн ырыалары толорон көрөөччүлэрбит үөрүүлэрэ өссө үрдээтэ.
Ити курдук көрсүһүүбүт бэрт истиҥник уонна сэргэхтик ааста.
Евдокия Прокопьева
