«Тыллаах буоламмыт тыыннаахпыт, саҥалаах буоламмыт Сахабыт» диэн этиллэринии хас биирдиибит төрөөбүт төрүт тылга харыстабыллаах сыһыаныттан, ийэ тылбыт сарсыҥҥыта тутулуктаах.
Саха Өрөспүүбүлүкэтин маҥнайгы президенэ М.Е.Николаев уурааҕынан Ийэ тыл уонна сурук-бичик күнэ 1996 сыллаахха саха норуотун чулуу уола, улуу сырдатааччы Семен Андреевич Новгородов төрөөбүт күнүгэр олохтоммута. Бу кэмтэн, олунньу 13 күнүгэр, саханы саха дэтэр саха суругун-бичигин күнэ киэҥ далааһыннаахтык бэлиэтэнэр.
Ийэ тылынан ааҕыы киһи тылын байытар, сахалыы толкуйун сайыннарар сүдү суолталаах. Библиотекабыт 2014 сылтан сахалыы Брайль систиэмэтинэн ааҕыы уонна суруйуу күрэҕин тиһигин быспакка ыытар. Быйылгы үгэс буолбут күрэхпит Уһуйааччы сылыгар ананан, «Таптыыр сахам тылынан» диэн ааттанан олунньу 9 күнүгэр бэрт сэргэхтик ыытылынна.
Библиотека үлэһиттэрэ күрэх кыттыылаахтарын күн төгүрүк алаадьынан күндүлээтилэр, саха тылын баайын, дэгэтин, этигэн кэрэтин туһунан биллэр уус тыллаах поэттарбыт хоһуйууларын ааҕан иһитиннэрдилэр. Салгыы кыттааччылар саастарынан – «улахан дьон», «оҕолор», таһымнарынан – «кэскиллээх», «күүстээх» бөлөхтөргө арахсан күрэх үс түһүмэҕин сорудахтарын толордулар.
«Ааҕыы күрэҕэ» – бу түһүмэххэ Суорун Омоллоон «Хараҥаҕа тыкпыт сырдык», Софрон Данилов «Сүрэх тэбэрин тухары» айымньылартан мүнүүтэҕэ ааҕыы.
«Суруйуу күрэҕэ» – сахалыы өс хоһооннорун бэриллибит бириэмэҕэ суруйуу.
«Сахалыы мин билиим» – тылы билиигэ анал тест сорудахтарын толоруу.
Уруулуу тыллаах омукпут Башкирия биллэр суруйааччытын Айгиз Баймухаметов «Хаалларыма ийэкээ…» айымньытын Афанасий Гуринов – Арчылан сахалыы тылбааһа «саҥарар кинигэ» буолан таҕыста. Кинигэ сүрэхтэниитэ олунньу 16 күнүгэр, Ийэ тыл уонна сурук-бичик күнүн чэрчитинэн библиотекабыт ааҕар саалатыгар ыытыллыа. Бу күн күрэх түмүгэ тахсыа, кыайыылаахтар наҕараадаланыахтара.
Күндү ааҕааччыларбыт, көхтөөх кыттыыгытыгар махтанабыт! «Эбиллибэт билии көҕүрүүр» диэн өс хоһоонугар этиллэринии, бу курдук элбэҕи ааҕан, ааҕыыны, суруйууну дьүөрэлии тутан билиигит-көрүүгүт хаҥыы турдун!
Ульяна Чичигинарова