«Ааҕыы эйгэтэ» сахалыы уус-уран ааҕыыны сэргээччилэр түһүлгэлэрин күндү ыалдьыта биһиги кэммит кэрэхсэбиллээх суруйааччыта, прозаик, суруналыыс — Иван Афанасьевич Андросов-Айанньыт.
Сахалыы кинигэни сэргиир, саха тылынан, омукпут историятынан умсугуйар библиотекабыт ааҕааччылара Иван Андросов-Айанньыт «Тумаҥҥа симэлийбиттэр» кинигэтин бастакы олуга тахсыаҕыттан олус сөбүлээн туран аахпыттара, салҕыыта тахсарын тэһийбэккэ кэтэһэр буолбуттара.
«Айар» кинигэ кыһатыгар бэчээттэнэн тахсыбыт түөрт кинигэлээх «Тумаҥҥа симэлийбиттэр» роман, төрдүөн библиотекабыт саҥаны уонна дорҕоону устар устуудьуйатыгар саҥардыллан, ааҕааччы биһирэбилин ылар.
Кэбээйи Мукучутуттан төрүттээх Иван Андросовы — Андросов оҕо аймах сөбүлүүр «Кэскил» хаһыатыгар өр сылларга үлэлээбитэ. Араас темаларга чуолаан булт, спорт эйгэтин табыллан сырдатар биир бастыҥ суруналыыс. Баардаах баара өтөн, талааннаах, хомоҕой тыллаах суруйааччы быһыытынан биллэн барбыта. Маҥнайгы кинигэтэ булт, аныгы кэм булчуттарын тустарынан көрдөөх кэпсээннэрин түмэн, 2013 с. «Куорат булчуттара», 2014 с. «Бэтэрээнискэй» кинигэлэрэ бэчээттэнэн тахсыбыттара. 2018 сылга, кини «Тумаҥҥа симэлийбиттэр» романын бастакы кинигэтэ тахсыбыта.
Бу романыгар Иван Андросов-Айанньыт Сахабыт сирин былыргытын суруйар. Ол кэмнээҕи олоҕу-дьаһаҕы, кыргыс үйэтинээҕи биис уустарын бэйэ бэйэлэригэр сыһыаннарын, норуот кэскилин түстээһини итэҕэтиилээхтик суруйар. Көрсүһүүгэ үһүйээннэргэ олоҕурбут айымньытын айыллыытын туһунан ааптар бэйэтэ сиһилии сырдатта.
Киэҥ далааһыннаах роман тыла-өһө, сюжета ааҕааччыга тиийимтиэтин мустубут дьон бэлиэтээн эттилэр. Суруйаачыга сэргэх кэпсээнин иһин махтананан, айар үлэтигэр ситиһиилэри, ааҕааччы биһирэбилин ыла турарыгар баҕа санаабытын эттибит.
Ульяна Чичигинарова