Хас биирдии тэрилтэ, ханна да буоларын курдук, бэйэтэ туспа устуоруйалаах, үлэлээн-хамсаан олорор суоллаах-иистээх, ураты хайысхалаах, олук уурсубут бэлиэ дьонноох буолар. Республикатааҕы көрбөттөр библиотекалара төрүттэниэҕиттэн, араас сыллар усталарыгар, күн бүгүнүгэр диэри үгүс көлүөнэ библиотекарь үлэлээн кэллэ.
Бүтүн Арассыыйатааҕы библиотека күнүгэр үгэстэри тиэрдээччи, көлүөнэлэр ситимнэрин, сыаннастарын илдьэ сылдьар ветеранарбытын үбүлүөйдээх сылларынан эҕэрдэлээн, куйаар ситимин нөҥүө “Сүрэхпит сылааһын аныыбыт” диэн, истиҥ иһирэх кэпсэтии тэрилиннэ.
Идэбит бырааһынньыгын көрсө библиотекабыт ааҕар саалатыгар 2021 сылга үбүлүөйдээх ветеранарбыт: Саха Республикатын культуратын туйгуна, үлэ ветерана 1976-2000 сылларга Республикатааҕы көрбөттөр анал библиотекаларын директора Шишигина Анна Афанасьевна, Саха Республикатын культуратын туйгуга, “Гражданскай килбиэн” бэлиэ хаһаайката, 1974 сылтан үгүс сыллар тухары ааҕааччыны кытары үлэлиир салаа библиотекарынан үлэлээбит, үгүс ааҕааччы махталын ылар үлэ ветерана Романова Анна Петровна, Саха Республикатын культуратын туйгуна, 1992 сылтан звукостудия тутаах үлэһитэ Неустроев Петр Петрович, 2005-2014 сылларга ситиһиилээхтик үлэлээбит, баай опыттаах библиотекарь Осипова Августа Петровна тустарынан үлэлэрин сырдатар информационнай быыстапка тэриллиннэ.
Үөрүүлээх тэрээһиҥҥэ ветераннар библиотека эйгэтигэр хайдах кэлбиттэрин, библиотекарь идэтигэр ханнык хаачыстыба баһыйыахтааҕын, уһун сылларга салгыбакка биир идэҕэ бэриниилээхтик үлэлээһин кистэлэҥин туһунан санааларын үллэһиннилэр.
Куйаар ситимин нөҥүө биһигини кытта биир ситимҥэ холбоммут эрэллээх, махталлаах ааҕааччыларбыт Николай Михайлович Спиридонов, Пассар Мария Николаевна, Колодезников Эдуард Григорьевич, Данилова Сахаайа Дмитриевна, Корнилов Валерий Русланович уо.д.а. истиҥ кэпсэтиигэ кыттыһан, ааспыты ахтан-санаан аастылар, үгүс үтүө тыллары эттилэр.
Бырааһынньыкааҕы көрсүһүүнү библиотека доҕоро Сардана Окоемова бэйэтин ылбаҕай ырыатынан киэргэттэ. Ону тэҥэ профком тэрийиитинэн «Мир наших увлечений» хобби-быыстапка уонна “Библиотека в кадре” фотоконкурска киирбит библиотека үлэһиттэрин бастыҥ үлэлэрэ турдулар. Быыстапкаҕа турар үлэлэр библиотекардар үлэни таһынан сынньалаҥы дьүөрэлии тутан араас интэриэстээхтэрин, дьоҕурдарын, сатабылларын көрдөрдүлэр.
Инники үлэлээн ааспыт көлүөнэ баай уопутугар олоҕуран, библиотека инникигэ эрэллээхтик хардыылаан, салгыы сайдар. Олох саҥа ирдэбиллэригэр эппиэттиир гына бүгүҥҥү эдэр коллектив саҥаттан саҥа кирбиилэри дабайар. Күндү ветераннарбыт, тэрилтэ түбүктээх үлэтигэр билигин да күүс-көмө буоларгытыгар махтанабыт!
Ульяна Чичигинарова