Кэрэлиирэ киһибин

Кэтэспэтим кэлиэ дуо,

Маанылыыра киһибин

Манаспатым баара дуо?

Симэҕинэн ыһыллан

Сиэдэрэйэ сайыным,

Сибэккилии аһыллан

Ситэр этэ тапталым.

Умайаллар иэдэспэр

Уураһыыбыт уоттара,

Долгутуулаах киэһэлэр

Дьоллоругум буолтара.

Дууһабыттан арахсан

Дьоллоох күннэр барбаттар:

Доҕоччугум барахсан

Турар мэлдьи харахпар.

Таптал уотун умуоран,

Таарыйбакка ааһыа дуо?

Толоон кэрэ оһуорун

Тумна хаама туруо дуо?