Ол аайы дьэ айгыстыбатым,
Субу айанныах эрээри,
Ааһар тыаллардыын аргыстастым
Эһиэхэ көтөн кэлээри.
Төһө да кырдьан ыараатаргыт,
Доҕотторуом, киирэн көрсүҥ!
Билигин тугу дьыксаараргыт
Тохтоон-туран хаалар үһү.
Өлүүгүтүн үлэлээтэххит
Үйэҕит-сааскыт тухары,
Өр да буолла көрсүспэтэхпит
Үөлээннээхтэр түмсэн бары…
Үчүгэйдик да атаарсарбыт,
Өссө этэрбит бүппэтэ,
Үгүс сылларга арахсарбыт
Өйгө хайдах да түспэтэ.
Иннибитигэр күүтэллэрэ
Үлэ, үүнүү, аат-суол, былаас.
Ханнык эрэ дьиэ күүлэтигэр
Хаалан хаалбыта эдэр саас.
Киниттэн улам ыраатарбыт
Киниэхэ төннөөрү бүгүн,
Төһө да кырдьан ыараатаргыт,
Доҕотторуом, киирэн көрсүҥ!