Моҕотой, Муруку, Мыһыттык,
Дьирики, Күрдьүгэс диэн,
Ааттыыллар көхсө эриэн
Күрэҥ кыылы араас-араастык.
Кини ойуурга сырыттахха
Көрөөт да ыҥырардыы,
Көрдөөхтүк чыбыгырыы
Баар буолар маска тахсыбыта.
Модун тиит муҥур чыпчаалыгар
Моҕотойу куоттаран,
Моторуспут уолаттар
Мутугунан быраҕаттыыллар.
Оттон ол тиит төрдүгэр манаан
Ураҕастаах уол турар,
Оо, моҕотой оннугар
Охтор бэйэтэ, сыыһа дайбаан.
Туох мөлтөх уолай бу, диэхтэрэ
Тустаахха кыһыы бөҕө,
Ол эрэн быһый, бөҕө
Буолуоҕа кини оннук эрэ.