Араас диэн остуоруйалар
Аан дойдуга толорулар,
Олортон саамай баайдара —
Норуот остуоруйалара.
Бэртээхэй остуоруйалар
Мэлдьитин айыллаллар,
Олор төрүүр уйалара —
Норуот остуоруйалара.
Кэрэ да остуоруйалар
Кэм ыар тыынын тулуйбаттар,
Арай ону уйуохтара
Норуот остуоруйалара.
Саҥа остуоруйалары
Санаатылар да айбаттар.
Айа сатааннар даҕаны
Андерсеннар аҕыйахтар.
Онон остуоруйалары,
Оҕолорго да диэн анаан,
Бүтүн кинигэ тухары
Бооччойбоппут буолуо сатаан.
Онтон эрдэ быһаарынан
Уурайар ордук буолуоҕа:
Сыппах тыл-өс арааһынан
Сытыы өйү иитиэҥ суоҕа.
Өрүс тааһын курдук өр кэм
Чочуллубут тыл-өс эрэ
Тыһыынча сыллартан кэлэн
Тырымныы сырдыыра кэрэ.
Оҕо аймах ол тылынан
Олорор, сайдар, ыралыыр,
Остуоруйа дойдутунан
Ол курдук кини айанныыр.