Лабаалара нуоҕалдьыһа,
Сэбирдэхтэрэ тэлибирии
Хамсыыллар тыал хоту хатыҥнар.
Нуоралдьыма, Нуоралдьыма,
Эдэрбэр курдук эҕэрдэлии,
Эн уста сытаҕын анныбар.
Аргыый аҕай нусхалдьыйан,
Уп-уһун суһуоҕун суунаары,
Киирэрэ кэрэ кыыс эйиэхэ.
Нуоралдьыма, Нуоралдьыма,
Сибэкки сүүмэҕин уунаары,
Кэлэрим онно мин киниэхэ.
Ол курдук суорамдьылаһан,
Ол кэрэ кыыһы мин сотору
Сүгүннэрэн ыраах иппитим.
Нуоралдьыма, Нуоралдьыма,
Билигин даҕаны ол ону
Бэркэ диэн эн өйдүүр инигин?..
Суох аны мин Суоһалдьыйам…
Суһуоҕун сүүмэҕин аҕалан,
Соҕотох бу кэлэн турабын.
Нуоралдьыма, Нуоралдьыма,
Эн кыыһыҥ кутун бу аҕалан,
Эйиэхэ мин кэлэн турабын…
Лабаалара нуоҕалдьыйа,
Сэбирдэхтэрэ тэлибирии
Хамсыыллар тыал хоту хатыҥнар.
Нуоралдьыма, Нуоралдьыма,
Эдэрбэр курдук эҕэрдэлии,
Эн уста сытаҕын анныбар…