Эн үөр-көт бу күөхтэн, сырдыктан,
Ол эрэн бэрт уһун сылгыттан
Бэрт кылгас сайыҥнын көҕүрэт.
Хаалыаҕа бэрт уһун кыһыныҥ —
Хайдах да куораккын көҕөрт эн
Хаар сабыа сотору барытын.
Тоҕо да ол иһин этиллиэй
Дьокуускай туспалаах куорат диэн,
Ким манна фонтаны тэнитиэй?
Ол хаһан кыһыны киэргэтиэн.
Оо, дьоллоох Дьокуускай, эт эрэ,
Оччоҕо туохханый эн кэрэҥ?
Аатырар туһугар куораттар
Аарыма тутуулаах буолаллар.
Дьокуускай даҕаны туппакка
Үп-харчы үрдүгэр олорон,
Тунах да ыһыахтаан турбакка
Үс Хатыҥ толоонун толорон!
Тоҕо да ол иһин этиллиэй
Дьокуускай туспалаах куорат диэн,
Дэлэҕэ ыһыаҕын тэйитиэй
Үс үөдэн түгэҕэр сөптөөх диэн.
Оо, дьоллоох Дьокуускай, эт эрэ,
Оччоҕо туохханый эн кэрэҥ?
Хараамнар, хаттыастар тахсаллар,
Хаарбах да дьиэлэрбит барсаллар.
Ыксалга киэргэтии, көҕөрдүү!..
Ыалдьыттар куораты хайгыыллар.
Баарынан сатаммат көрдөрүү,
Барытын тупсара сатыыллар.
Тоҕо да ол иһин этиллиэй
Дьокуускай туспалаах куорат диэн,
Туох аанньа дьон манна иитиллиэй
Туой аайы хараҕы баайан диэн.
Оо, дьоллоох Дьокуускай, эт эрэ,
Оччоҕо туохханый эн кэрэҥ?