ӨЙ! Көстүбэт маннык эттик
Менделеев таблицатыгар:
Бэрт өртөн кини баар эбит
Биһиги мэник баспытыгар.
Өй көстөр киһи хараҕар,
Этэр тылыгар эмиэ биллэр;
Кини кимиэхэ баҕарар
Киэн туттуу кэриэтэ иһиллэр.
Өй атом күүһүн арыйда,
Өй космос куйаарын өҥөйдө,
Өй үөрэҕи сайыннарда,
Өй олоҕу өрө көтөхтө.
Көмүстэн, алмаастан күндү,
Сыаната биллибэт бу баайы
Халаары тииһэллэр өрүүтүн
Хараҥа күүстэр хас сир аайы.
Өй айбытын өрө тута,
Өйү бэйэтин туораталлар;
Кини күүһүн түҥ-таҥ туттан,
Киһи аймаҕы буораталлар.
Ол иһин алҕаһын өйдөөн
Улуу өй сэрэтэр, көрдөһөр:
Дьонноор, бүтүҥ өрөгөйдөөн:
Барометр буурҕаны көрдөрөр!..
Ардыгар мин айыыларым
Алдьатар сыаллаах этилэрэ,
Билигин ол айыылары
Билинэр кэмнэр кэллэхтэрэ.
Ол эрэн өс-саас салҕанар
Өссө ыар, үрдүкү таһымҥа —
Араас сүһүрүү тарҕанар
Океаҥҥа, сиргэ, салгыҥҥа…
Бу мантан букатын куотан,
Мунуохха дуу космос түгэҕэр,
Манна даҕаны баар буолан:
Наадыйар суох курдук сүбэбэр…
Ол эрэн сиргэ бу маны
Тохтотор күүс мин эрэ баарбын:
Мин, ӨЙ, айбытым буомбаны —
Мин быыһыах тустаахпын Сир шарын!