Бу дойдуга букатын кэлбит курдук
Буолан-хаалан биэрээхтиибит.
Ааһан баран санаатахха, онтубут
Аанньата суох быһыы эбит.
Үчүгэйи, куһаҕаны барытын
Өлөр өлүү биирдэ тэҥниир:
Аар-саарга аатырарыҥ аатырбатыҥ,
Арааһа, киниэхэ син биир.
Ол иһин хас бииргит олорон аастын
Олоҕун бар дьоннуун тэҥҥэ:
Эбэтэр барыгыт эҥин араастык,
Эбэтэр бары этэҥҥэ.
Өссө үлэҕитин үтүө илдьиттии
Үксүн чөкөтөн кэбиһиҥ,
Өйдөөбөккө да хаалыаххыт илдьэттии
Өлүү обургу кэлбитин.