Халыҥ, чараас тэтэрээттэр —
Дьоннор тохтообут санаалара,
Толкуйга түһэр редактор,
Туохханый бу дьон талааннара?
Онно кини эппиэттиэхтээх,
Уруккулуу биир киэп суох аны.
Билигин дьэ эрэдээктээх
Бэчээттиир, аккаастыыр даҕаны.
Хоһугар соҕотох бүгэн,
Кини өр көннөрөр, кылгатар,
Кыламныыр кыымнары түмэн,
Кыракый уоту син уматар.
Ол кыра уот маҥнай утаа
Айар дьон дууһатын сылытыа,
Онтон, баҕар, улуу кутаа
Умайан олоҕу сырдатыа.