Бүгүн дьон-сэргэ бүтүннүүтэ
Таҥныбыт мап-маҥан таҥаһы.
Иһиллэр кыыс оҕо күлүүтэ,
Илгийэ сүрэххэ сылааһы.
Туох буолла бу манна эмискэ?
Сирэйдиин-харахтыын сырдыыбыт.
Саас кэллэ биһиэхэ, саас кэллэ!
Ол иһин бу маннык сырдыыбыт.
Маҥнайгы бу сааскы сарсыарда
Мастарга үөр чыычаах айманар.
Тулабыт куустарар сарыалга,
Дууһабыт ыллыаҕын баҕарар.
Биһиги барыбыт эмискэ
Оҕолуун-улуулуун ыллыыбыт.
Саас кэллэ биһиэхэ, саас кэллэ!
Ол иһин бу маннык ыллыыбыт.
Харанга сарсыарда сэрэйэн
Хабыалас тымныыга хаамарбыт,
Үллэйэр туманы силэйэн
Үлэлии, үөрэнэ барарбыт.
Былыттан күн көрөр эмискэ —
Быһыыта, мүлүйэр тымныыбыт.
Саас кэллэ биһиэхэ, саас кэллэ!
Быраһаай, бытарҕан тымныыбыт!