Күнүм-дьылым аҕыйаата
Көрү-нары батыһыаҕы —
Күн сиригэр кэлбит аата,
Баҕарыллар туһалыаҕы.
Хамнас эрэ иһин үлэ
Харааһыннарар санааны,
Халтайга умайыы күлэ
Хаххалыыр курдук халлааны.
Туһата суох, толуга суох
Туох олоҕуй, туох үлэний?
Туох иһин киһиэхэ күүс-уох
Төрүөҕүттэн бэриллэрий?
Тоҕо биһиги ардыгар
Бу бэлэҕи умнабытый?
Санаарҕаан, саараҥнаан ылар
Түгэннэри тумнабытый?
Тоҕо дууһа долгуйуутун
Уҕарыта сатыыбытый?
Аҥардас кини сойуутун
Айдаарары сатыыбытый?
Тоҕо санаа ырааһынан
Сайдыбаппыт, олорбоппут?
Доҕор-атас арааһынан
Тулабытын толорбоппут?
Тоҕо дьоҕурдаах чулуу дьон
Бүгүн дьоҕус сыаллаахтарый?
Хаһааҥҥьггтан ыла хордьон
Отон ордук сыаналааҕый?…
Хойутаан даҕаны да буоллар
Билэбин дуу мин баҕабын:
Сор-муҥ бөҕөнөн суруллар
Субурҕалары таҥабын.
Сүрэҕим нүөлүйэ ыалдьар:
Мин үөрэбин, хомойобун,
Мин сүрэхпэр сөҥө сылдьар
Хоһооннору чочуйабын.
Кинилэргэ, оо, кыым санаа
Биирдэ эмэ күлүм гыннар,
Биирдэ эмэ дьоҥҥо анаан
Этэр тылым табылыннар!