Күнүһүн, оо, тыаһыан саҥа кэм куората!
Көрбүтүҥ: көлөһө, көлөһө элэҥниир,
Тумнарар букатын массыына буруота…
Кулгааҕыҥ куугунуур, хараҕыҥ
дьиримниир.
Күнүһүн, оо, сүрүөн саҥа кэм куората!
Иннигэр сыгынньах ис бөҕө килэҥниир,
Өлөрөр букатын үс дойду муодата…
Кулгааҕыҥ куугунуур, хараҕыҥ
дьиримниир.
Күнүс, оо, киһитиэн саҥа кэм куората!
Толору уулусса тугу ол дьиктиргиир?
Көрдөрбөт букатын күлүк дьон муората…
Кулгааҕыҥ куугунуур, хараҕыҥ
дьиримниир.
Күнүс, оо, кэрэтиэн саҥа кэм куората!
Күн уота күлүмнүүр, сир ньуурун күөх
симиир,
Үөрдүбэт ол эрэн өҥ дойдуҥ уорҕата…
Кулгааҕыҥ куугунуур, хараҕыҥ
дьиримниир.
Оттон түүн хайдаҕый саҥа кэм куората?
Уулусса кураанах, ыт охсор киһи суох,
Ыччаппыт даҕаны ыллаабат дуората.
Оо, курус хартыына ол, киһи хомойуох!
Оттон түүн хайдаҕый саҥа кэм куората?
Наадалаах даҕаны таһырдьа хаамсыбат.
Абырыыр уулусса таксыынан туолбута,
Аҕаллын эрэ — дьон харчытын аахсыбат.
Оттон түүн уот бөҕө саҥа кэм куората,
Олох да суох курдук уоруйах, күлүгээн.
Ол эрэн ол киһи, оо, кыайан куоппата!..
Хара дьай күүстэрэ хаалаллар көрүлээн.
Оттон түүн уу чуумпу саҥа кэм куората,
Түннүкпүн аспытым түүн үөһэ уу чуумпу,
Уу чуумпу уһун түүн усталаах-туората,
Халлаан да сырдыыта оннооҕор
уу чуумпу…
Оо, араас күнүс-түүн саҥа кэм куората,
Олоҕо тыатааҕар уон төгүл умсулҕан.
Ол иһин тыа дьонун сытыыта-хотуута
Олорор куоракка дьиэни да уларсан.
Оо, ырай дойдута — саҥа кэм куората!
Оҕолуун-уруулуун табаахтыыр, пиибэлиир.
Умнуллар күөх алаас күөрчэҕэ, суората…
Дьон тугу гынарым барыта көҥүл диир.
Биһиги билэбит: саҥа кэм куората
Күнүһүн дөйүтэр тыастааҕын-уустааҕын,
Түөкүннүү албынын түүннээҕи чуумпута,
Тураҕас киһиэхэ туох да сүр суостааҕын.
Манна ким кими да көрсүбэт истиҥник,
Сороҕор кыайарын суолуттан туората…
Аан дойду үрдүнэн, арааһа, итинник
Аччыгый, улахан саҥа кэм куората.