Оо, соноҕоһум ардыгар
Охтороору мөҕөн да туруо,
Арыт куотуу холоругар
Кутуруга быалыы субуллуо.
Туохтан эрэ үргэн баҕар
Туорута даҕаны ойуолуо,
Киирэр күн сардаҥатыгар
Кэрэ хартыынаны ойуулуо.
Онтон эмиэ сүнньэ көнөн
Тохтообокко сиэлэн дьоруолуо,
Нэксиэттэн өрүтэ көтөн
Дьэ тулуйар киһи тулуйуо.
Сылгы ааттаах буолан баран
Сыһыйбат буолара кэлиэ дуо —
Соноҕоһум айааһанан
Сотору ат бастыҥа буолуо.
Мин соргулаах соноҕоһум,
Миинэр миҥэм, айанныыр атым
Соҕотох суолбар доҕорум,
Аҥаардас айаммар атаһым!
Эн үөрдэххинэ кистиигин,
Хомойдоххуна тыбыыраҕын.
Мин үөрдэхпинэ кэпсиибин,
Хомойдохпуна кыыһырабын.
Ол иһин дуу мин эйигин
Истиҥ доҕордуу ылынабын,
Ырааҕыҥ-чугаһыҥ иһин
Ыарахан күммэр ыҥырабын.