Сэдэх бэстэр быыстарынан
Сэлээппэлэр көстөллөр:
Сэгэрдиилэр, атастыылар
Сэмээр сылдьан көрсөллөр.
Чочур Мураан чугаһыгар,
Ытык Күөл ыксатыгар
Толуу дьонум чугасаһар,
Ытык дьонум ыксалаһар.
Былыргылыы сирсии эҥин
Быһаччыта умнуллар,
Быйылгыны, эһиилгини
Быһаарсыһар туһугар.
Кыһарыйан кэлэр кырдьыы,
Кыраһыабай диэбэккэ —
Кыһансыһан кытта кырдьыы
Кылаабынай биэтэккэ.
Тохтуу түһэн дойҕохтоһор,
Кэлэ-бара кэҕиһэр,
Элбэх этэ атас-доҕор
Этэр-тыынар кэмнэргэ.
Онтон туох да хаалбат эбит
Олох саамай кэннигэр,
Ол иһин дьэ сөптөөх эбит
Ону өйдүүр кэмигэр.
Чочур Мураан чугаһыгар,
Ытык Күөл ыксатыгар
Толуу дьонум чугасаһар,
Ытык дьонум ыксалаһар.