Бу хаарбах дьиэҕэ, хата,
Туох да суох буолуо диэбиппит
Сэдэмдьигэ туттарга
Сээкэй мал-сал син баар эбит.
Үс атахтаах олоппос,
Ол муннукка остуол дуома,
Аана суох алдьаммыт хос,
Биллэрик орон унуоҕа.
Бу манна биһиктэнэн,
Үнэн, аттаан, сыҥаһалаан,
Хара буор тилэхтэнэн
Хааман бардахпыт аан бастаан.
Оттон бүгүн сааһыран,
Эт бэйэбит эстэн-быстан
Кэриэспитин хааллара
Кэлэн турабыт мунньустан.
Хаалбыт сиргэ, өтөххө
Олох-дьаһах тэринэргэ
Суобаспыт тыл көтөхтө
Бу буккуурдаах ыар кэмнэргэ.
Тутарын тутуохпут да
Туохха тиэрдээхтиир онтубут:
Өтө көрүү суоҕуттан
Төһөлөөх дьыаланы тохтубут.
Өҥ кырыска түспэккэ
Үчүгэй да санаа өлөр –
Сатаныа дуо эмискэ
Киһини сиргэ төннөрөр.
Баҕар, эмиэ алҕаһаан
Баратыахпыт сүрэх эмин.
Оҕобут маны салҕаан
Олоруо дуо манна кэлэн?..