Тайҕа саамай талыы кыыла —
Тайахпын диэн,
Кини киэҥник хардыылыыра
Кэрэкэтиэн!
Тиити төргүү мутугунан
Тэҥҥэ тура,
Кини маннык модунунан
Киэн туттара.
Ол эрээри бу үлүгэр
Улахана,
Куотан тыаҕа түһэригэр—
Куһаҕана.
Ойуур хара сыбарыгар
Ойуо баар дуо!
Ол өстөөҕө сырсарыгар
Олус буолуо.
Кини ол иһин ойуолуур
Киэҥ сиринэн,
Ыт да, бөрө да сойуолуур —
Ыл, сиэ ситэн!
Мөлтөөбүтүн туһаныаҕа
Бөрө таайан,
Ыраах булчут чугаһыаҕа,
Ыта хаайан.
Тайах лаҥкыр муостарынан
Киирсэн көрүө,
Тайҕа лааҥкы мастарыгар
Сууллан түһүө…