Таптал диэн суоҕу да баар гыныы,
Оҥоруо да суоҕу оҥоруу,
Ырыанан барытын ылыныы,
Оһуордаах олоҕу олоруу.
Таптал диэн таарымта кэриэтэ
Тахсарын-киирэрин билбэккин:
Минньигэс бөҕөлөөх мэҥиэтэ,
Аһыыта, ньулууна ол кэлин.
Таптал диэн абытай-татакай,
Ыксала-тиэтэлэ быһымах,
Абылыыр күүһэ диэн алдьархай
Алҕаһыыр да ыраах буолбатах.
Ол эрэн түгэнин буланнар
Омуннаах тапталы билбиттэр,
Алҕаһаан даҕаны бараннар,
Арааһа, кэмсиммэт эбиттэр.
Хата дьэ алҕаһыам дии санаан
Айыыга киирбэтэх аанньаллар
Аҥаардас ол биирдэ алҕаһаан,
Ардыгар санаарҕаан ылаллар.