Үйэ-саас тухары соҕотох
Үрэх, тыа иччитэ буолбакка,
Аар тайҕа биир сэмэй оҕото
Барбытым мин ыраах куоракка,
Барыта килиэ таас куоракка.
Бу куорат буолбута миэхэҕэ
Эрэлим, киэн туттуум, тапталым.
Эҕэрдэ, эйиэхэ эҕэрдэ,
Эҕэрдэ, тапталлаах куоратым,
Мин куппун туттарбыт куоратым!
Сир-дойду, сиэр-майгы, дьол-соргу
Манна мин дуумайым буолтара.
Аны мин дууһабар урукку
Оҕотук санаалар суохтара.
Ордук-хос тыллар да суохтара.
Бухатыыр бу куорат ырыата
Модуна, сырдыга, кэрэтэ –
Ыраах баар муус дойдум кырыата
Харахпар бу көстөн кэлэрэ,
Хаар дойдум бу көстөн кэлэрэ.
Бу кэрэ куоракка маарынныыр
Куораты мин онно тутарым,
Аан дойду дьоннорун маанылыыр
Аар тайҕа иччитэ буоларым,
Аан дойду киһитэ буоларым.