Былыр сааскы быстыаҥкаҕа
Быстыы-ойдуу да баара,
Хас биир булчут хара тыаҕа
«Хара» көрдөөн хаамара.
Дьолго, арыт тоҥот буолан
Тураллара тууттарга,
Сойо илик суолу булан
Сойуолаһыы буолара.
Сындааһыннаах сылайара,
Элэйэрэ иҥиирдээх.
Тайах куотан тамайара,
Онтон улам эрэйдээх
Чолуо муустуу тоҥмут хаарга
Тобулута түһэрэ,
Тыһа быһа баран, хаана
Тыга-тыга сүтэрэ.
Булчут түүлээх хайыһара
Бу сырылаан кэлэрэ,
Тайах ыттыын дьарыйсара,
Онно булчут ситэрэ.
Тоҥоттоон сиэбит тайаҕын
Дьонноругар түҥэтэ,
Салгыыра саха аймаҕын
Кини булчут киһитэ.