Бары даҕаны үчүгэйкээннэрин,
«Барахсаттары да!» — дии санаатым,
Тэлгэһэбэр үүнэр үүнээйилэри
Үгүстэрин хоһуйа сатаатым.
Ол эрэн олордооҕор ордуктара,
Итилэрдээҕэр эриэккэстэрэ,
Саамай сарыыссалара умнуллара
Сатаныа суох курдук хайдах эрэ.
Бу үүнээйи биллэр сүр эмтээҕинэн,
Дьоҥню-сэргэҕэ туһалааҕынан,
Оттон эрэ ордук сүмэлээҕинэн,
Аһы тупсарар амтаннааҕынан.
Бу үүнээйи буоссалаах буккааһынан
Кытай да чаайынааҕар баай курдук,
Ол иһин да Уйбаан-чаай диэн аатынан
Аан дойдуга аатырдаҕа ордук.
Ол иһин даҕаны нуучча киһитэ
Уйбаан-чаайы олус таптаан иһэр,
Биитэр кинини атыҥҥа эргитэ
Мэлдьи тахсара омук сиригэр.
Оттон сахаҕа былыр-былыргыттан
Бу үүнээйи Куруҥ ото дэнэр.
Хатыҥ үөһүн, хатыҥ чээрэтин кытта
Кини эмиэ чаай курдук иһиллэр.
Мин тэлгэһэбэр үүнэр Уйбаан-чаайдар
Кыһыллыҥы-күөх сибэккилээхтэр,
Ол эрэн маннык кэрэ барахсаттар
Тулабын уһуннук симээбэттэр.
Күп-күөх оттору тойон ынырыалар
Адьас да аҕыйах күн иһигэр
Сүмэлэрин супту уулаан ыланнар,
Кубарыччы куурдан кэбиһэллэр.
Хаппыт дьөрбөлөрө хайыта баран,
Тыһыынчанан түү тыал хоту көтөр,
Ол курдук Уйбаан-чаайдар улам-улам
Уҥуохтара эрэ хаалар, өлөр…
Оттон хаһан эрэ, олох да былыр,
Куруҥ тыатыттан саха киһитэ
Бүтэй бүөрдээх куобахтарын кытары
Куруҥ оту хомуйан киирэрэ.