Улахан уу чуумпу кылаас.
Саҥа кинигэ сыта.
Манна сонун хас биирдии чаас,
Манна дьикти барыта.
Оттон учуутал тыллара
Олус да истиҥнэрэ!
Уолчаан дууһалыын ылларан
Устара ханна эрэ.
Учууталлар, учууталлар,
Улуу махтал эһиэхэ!
Үтүө-мааны ааккытыгар
Yc сахаттан эҕэрдэ!
Устара олох суолунан
Бу үөрбүт кыра киһи,
Илиилэрин өрө уунан
Этэр курдуга кини:
«Мин бүгүн үөрдүм, долгуйдум
Эн тускунан истэммин.
Дорообо, төрөөбүт дойдум,
Мин – саҥа киһи кэллим!»
Учууталлар, учууталлар,
Улуу махтал эһиэхэ!
Үтүө-мааны ааккытыгар
Үс сахаттан эҕэрдэ!
Учуутал, оскуола,суобас –
Бу биир суолталаах тыллар.
Өҥ эрэ сиргэ күөх куолас
Үчүгэйдик ас кутар.
Үүннун кэрэ, үтүө киһи
Айа-тута, олоро,
Киһи буолбут ытык иэһин
Дьон иннигэр толоро!