Чаҕыйбат буолуоҥ дуо дириҥтэн
Дьараҕа үөрэммит киһи,
Төлкөҥ ыйыппат эйигиттэн
Төһө да утарыҥ иһин.
Өҥ аатырбыт үрүт араҥа
Үйэ тыалыттан үрэллэр —
Ытыс таһыйар ыас хараҥа
Ыаһыра түһэр иннигэр.
Хараҥа эйигин эйимнии
Эҕирийэн илдьэ барар,
Мөхсөҕүн тарбаҕыҥ эймэҥнии
Сир-халлаан икки ардыгар.
Тимирэн даҕаны биэрбэккин,
Дагдайан да тахсыбаккын,
Ханна да бараргын билбэккин,
Ханна даҕаны барбаккын.
Халыҥ да хараҥа бүрүүкүүр!
Ханнык уот ону сырдатыай?
Оо, санаа, уот курдук, өрө күүр:
Хайаан хараҥа сабардыай?!
