Хайдаҕый тарбах сымсата,
Харах сытыыта, ууһа!
Хаамыска диэн бу, быһата —
Хамсаныыга искусство.
Хаайара, бокуой биэрбэккэ,
Хаба охсор баҕабыт —
Хараҥа-сырдык диэбэккэ,
Хаамыскалаан барарбыт.
Хас биирдии тарбаҕа сымса,
Хаалсыбат бэл эрбэҕэ —
Хастыыта да тура тахсар
Хаамыскаһыт элбэҕэ.
Хабар уочарат кэлбитин
Хайдах эрэ умнарбыт,
Хабыы түргэнин, кэрэтин
Хайгыы көрөн турарбыт.
Хайаан да киһи хамсатыах
Хаамыскатын ыйарбыт,
Хабааччы эрэ астыныах
Хартыынатын айарбыт.
Хаба туран имэҥнирэн
Ханна эрэ буоларбыт,
Хабар ньыма эҥиннэрин
Хата онно буларбыт.
Хайдаҕый тарбах сымсата,
Харах сытыыта, ууһа!
Хаамыска диэн бу, быһата —
Хамсаныыга искусство.